శాంతికి మెలానియా ట్రంప్ చొరవ.. రష్యా, ఉక్రెయిన్ మధ్య కీలక ఒప్పందం

అమెరికా ప్రథమ మహిళ మెలానియా ట్రంప్ అరుదైన దౌత్య విజయం సాధించారు. రష్యా, ఉక్రెయిన్ మధ్య జరుగుతున్న యుద్ధంలో కీలకమైన ప్రాంతంలో ఆమె చొరవతో తాత్కాలిక కాల్పుల విరమణ ఒప్పందం కుదిరింది. రష్యా అధీనంలో ఉన్న ఉక్రెయిన్‌లోని ఒలేష్కీ నగరంలో మానవతా సాయం అందించేందుకు, పౌరులను సురక్షిత ప్రాంతాలకు తరలించేందుకు ఈ ఒప్పందం మార్గం సుగమం చేసింది. ఈ కాల్పుల విరమణ అక్టోబర్ 29 నుంచి అమల్లోకి రానుంది.

ఈ ఒప్పందం వివరాలను మెలానియా ట్రంప్ స్వయంగా ఒక ప్రకటనలో వెల్లడించారు. ఒలేష్కీ నగరం 'విపత్తు అంచున' ఉందని, అక్కడి పరిస్థితి అత్యంత దయనీయంగా మారిందని ఆమె ఆందోళన వ్యక్తం చేశారు. నగరంలో మిగిలి ఉన్న వారిలో ఎక్కువ మంది వృద్ధులేనని, పరిమిత విద్యుత్ సరఫరా మధ్య ఆహారం, మందులు, మంచి నీటి కొరతతో తీవ్ర ఇబ్బందులు పడుతున్నారని ఆమె వివరించారు. 

ఈ మానవతా సంక్షోభాన్ని నివారించేందుకు తాను రష్యా, ఉక్రెయిన్ దేశాల నాయకత్వాలతో నేరుగా మధ్యవర్తిగా మాట్లాడి ఒప్పందం కుదిర్చినట్లు తెలిపారు.

ఈ ఒప్పందం ప్రకారం అక్టోబర్ 29 నుంచి ఒలేష్కీ నగరంలో ఇరుపక్షాలు సైనిక చర్యలను తాత్కాలికంగా నిలిపివేస్తాయి. ఈ సమయంలో నగరంలోకి మానవతా సాయాన్ని అనుమతిస్తారు. ఇరు దేశాలకు చెందిన పౌర నేతలు నగరాన్ని సందర్శించి, అక్కడి వాస్తవ పరిస్థితులను, అవసరాలను అంచనా వేస్తారు. 

నగరం నుంచి బయటకు వెళ్లాలనుకునే పౌరులకు వారు కోరుకున్న గమ్యస్థానాలకు చేరేందుకు సమన్వయంతో కూడిన సహాయాన్ని అందిస్తారు. ఈ మొత్తం ప్రక్రియను ఒక స్వతంత్ర మీడియా సంస్థ పర్యవేక్షించి, డాక్యుమెంట్ చేయనుంది.

ఉక్రెయిన్‌లోని ఖేర్సన్ ప్రాంతంలో, నీపర్ నది దక్షిణ తీరంలో ఒలేష్కీ నగరం ఉంది. 2022లో రష్యా పూర్తిస్థాయి దండయాత్ర ప్రారంభమైనప్పుడు ఈ నగరాన్ని రష్యా దళాలు స్వాధీనం చేసుకున్నాయి. యుద్ధానికి ముందు దాదాపు 24,000 జనాభా ఉన్న ఈ నగరంలో, నిరంతర సైనిక కార్యకలాపాల కారణంగా ప్రస్తుతం కేవలం 1,700 నుంచి 2,000 మంది మాత్రమే మిగిలి ఉన్నారని అంచనా. 

మానవతా సాయం కోసం సైనిక చర్యలను తాత్కాలికంగా నిలిపివేసే ఈ ఒప్పందంలోని అంశాలను రష్యా, ఉక్రెయిన్ అధికారులు కూడా ధ్రువీకరించినట్లు సమాచారం. అమెరికా ప్రథమ మహిళ నేరుగా జోక్యం చేసుకుని ఒక స్థానిక కాల్పుల విరమణ ఒప్పందాన్ని సాధించడం అంతర్జాతీయంగా చర్చనీయాంశమైంది.